પટના : પટના એરપોર્ટના ડાયરેક્ટરને બોમ્બ બ્લાસ્ટની ધમકી આપતો ઈમેલ મોકલવામાં આવ્યો છે. ધમકી મળ્યા બાદ એરપોર્ટની સુરક્ષા વધારી દેવામાં આવી છે અને વિવિધ સ્થળોએ સર્ચ કરવામાં આવ્યું છે. હાલમાં કોઈ શંકાસ્પદ વસ્તુ મળી નથી. પટના ઉપરાંત જયપુર એરપોર્ટને બોમ્બની ધમકી મળી છે. એરપોર્ટ પ્રશાસનને ધમકીભર્યો ઈમેલ મોકલવામાં આવ્યો છે. પત્ર મોકલનારએ લખ્યું, ‘ટર્મિનલ બિલ્ડિંગની અંદર બોમ્બ છે, બધાને મારી નાખવામાં આવશે. મેઈલ મળતાં જ વહીવટીતંત્ર એલર્ટ થઈ ગયું હતું અને સીઆઈએસએફ એ તપાસ શરૂ કરી હતી. પોલીસ અને બોમ્બ ડિસ્પોઝલ સ્કવોડને પણ જાણ કરવામાં આવી હતી. ટર્મિનલ બિલ્ડિંગ, એર સાઇડ અને પાર્કિંગ એરિયામાં સર્ચ ચાલુ છે. હાલ કોઈ શંકાસ્પદ વસ્તુ મળી નથી.
તે પહેલા જયપુરની એક ખાનગી કોલેજને પણ બોમ્બની ધમકી આપવામાં આવી હતી. પોલીસ અને બોમ્બ ડિસ્પોઝલ સ્કવોડે કોલેજમાં તપાસ કરી હતી પરંતુ કંઈપણ શંકાસ્પદ મળ્યું ન હતું. પોલીસે જણાવ્યું કે શાસ્ત્રી નગર સ્થિત એસએસજી પારીક પીજી કોલેજને એક ઈમેલ મળ્યો હતો જેમાં ધમકી આપવામાં આવી હતી કે કોલેજ પરિસરમાં બોમ્બ મુકવામાં આવ્યો છે. આ ઈમેલ ‘કેએનઆર’ ગ્રુપના નામે મોકલવામાં આવ્યો હતો, જેણે ગયા મહિને દિલ્હીમાં શાળાઓને આપવામાં આવેલી બોમ્બની ધમકીની જવાબદારી પણ સ્વીકારી છે. પોલીસે કહ્યું, ‘ઈમેલ મોકલનારને ઓળખવા અને તેને શોધવાના પ્રયાસો કરવામાં આવી રહ્યા છે.’
