કેન્દ્રીય નાણામંત્રી નિર્મલા સીતારમણ દ્વારા રવિવારે રજૂ કરવામાં આવેલા વર્ષ 2026-27ના બજેટમાં ગુજરાત સહિત છ રાજ્યોને મોટી ભેટ આપવામાં આવી છે.
નાણામંત્રીએ બજેટ ભાષણમાં ઐતિહાસિક જાહેરાત કરતા કહ્યું છે કે, પર્યાવરણ બચાવવા માટે ‘ડેડિકેટેડ ફ્રેટ કોરિડોર’ (DFC) બનાવવાનો પ્રસ્તાવ રજૂ કરવામાં આવ્યું છે. આ પ્રોજેક્ટ હેઠળ ગુજરાતના સુરતને છેક પશ્ચિમ બંગાળના ડાનકુની શહેર સાથે જોડવામાં આવશે, જેનાથી અનેક ઉદ્યોગોનો રાહત થશે.
નાણામંત્રીએ બજેટ ભાષણમાં સ્પષ્ટ કહ્યું છે કે, પર્યાવરણને નુકસાન પહોંચાડ્યા વગર માલસામાનની હેરફેર થઈ શકે, તે હેતુથી આ પ્રોજેક્ટની જાહેરાત કરવામાં આવી છે. આ કોરિડોર દ્વારા રેલ લોજિસ્ટિક્સમાં ક્રાંતિકારી ફેરફારો આવશે અને બંને રાજ્યોના ઉદ્યોગો સહિત અનેક સેક્ટરના માલસામાનની હેરફેર સરળ બનશે.
આ નવો કોરિડોર ગુજરાત, મધ્ય પ્રદેશ, ઉત્તર પ્રદેશ, બિહાર, ઝારખંડ અને પશ્ચિમ બંગાળ જેવા રાજ્યોને જોડશે. પૂર્વ ભારતના ખનિજ સમૃદ્ધ વિસ્તારો સીધા જ ગુજરાતના બંદરો અને મેન્યુફેક્ચરિંગ હબ સાથે જોડાશે. ખાસ કરીને સુરતના ટેક્સટાઇલ ઉદ્યોગ માટે આ કોરિડોર આશીર્વાદરૂપ સાબિત થશે, કારણ કે પૂર્વ ભારત સુધી કાપડ પહોંચાડવામાં સમય અને ખર્ચ બંનેમાં મોટી બચત થશે.
આ પહેલા ઈસ્ટર્ન અને વેસ્ટર્ન ડેડિકેટેડ ફ્રેટ કોરિડોરને ઘણી સફળતા મળી છે, ત્યારે આ ત્રીજો મોટા કોરિડોરથી રેલવે નેટવર્ક દ્વારા સામાનને ઝડપી પહોંચાડી શકાશે. આનાથી પેસેન્જર ટ્રેનોની અવરજવર વધુ સુધરશે અને માલવાહક ગાડીઓની ક્ષમતામાં વધારો થશે. પશ્ચિમના બંદરો અને પૂર્વના ઈન્ડસ્ટ્રીયલ હબ વચ્ચે સીધો સંપર્ક થવાથી દેશના અર્થતંત્રને નવી ગતિ મળશે.
