ડોલવણ પોલીસ સ્ટેશન વિસ્તારમાં જાહેરનામાનો ભંગ કરનાર મિલકત માલિકો સામે પોલીસે લાલ આંખ કરી છે. બેડચીત ગામમાં આવેલ કોમ્પ્લેક્સની દુકાનો ભાડે આપીને તેની જાણ પોલીસ સ્ટેશનમાં ન કરનાર બે શખ્સો વિરુદ્ધ એસ.ઓ.જી. શાખાએ કાયદેસરની કાર્યવાહી હાથ ધરી છે.
મળતી માહિતી અનુસાર તાપી એસ.ઓ.જી. શાખાના પોલીસ કર્મચારીઓ જ્યારે ડોલવણ વિસ્તારમાં ભાડુઆતની તપાસણી માટે પેટ્રોલિંગમાં હતા, ત્યારે બે અલગ-અલગ કિસ્સાઓમાં જાહેરનામાનો ભંગ જોવા મળ્યો હતો. બેડચીત ત્રણ રસ્તા પાસે આવેલ ક્રિષ્ના કોમ્પ્લેક્ષની એક દુકાન નવનીતભાઈ હરજીભાઈ કંબોડી (રહે.નવસારી) એ ભાડે આપી હતી. તપાસ દરમિયાન જાણવા મળ્યું કે તેમણે ભાડુઆત પાસે કોઈ ઓળખકાર્ડ માંગ્યું નહોતું કે પોલીસમાં જાણ કરી નહોતી. જયારે બીજા બનાવમાં આ જ વિસ્તારમાં આવેલ સાંઈ કોમ્પ્લેક્ષમાં અશ્વિનભાઈ ધીરૂભાઈ ગામીત (રહે.બાગલપુર) એ પોતાની દુકાન છેલ્લા ચાર વર્ષથી ભાડે આપી હતી. તેમણે પણ ભાડુઆતની કોઈ વિગતો પોલીસ સ્ટેશનમાં જમા કરાવી ન હતી.તાપી જિલ્લા મેજિસ્ટ્રેટ દ્વારા બહાર પાડવામાં આવેલ જાહેરનામા મુજબ, કોઈપણ મિલકત ભાડે આપતી વખતે તેની જાણ નજીકના પોલીસ સ્ટેશનમાં કરવી અનિવાર્ય છે. આ નિયમનું ઉલ્લંઘન કરવા બદલ બંને મકાનમાલિકો વિરુદ્ધ ગુનો નોંધવામાં આવ્યો છે.
