સોનગઢ નગરના દક્ષિણી ફળિયામાં સાંજે ઓવરલોડ ટ્રકમાં ચાલક અને ક્લીનર બેઠા હોવા છતાં ટ્રક બેકાબૂ બની રિવર્સ આવતા ૩ ટુ-વ્હીલર, બે કારનો કચ્ચરઘાણ કાઢી પૌત્ર-પૌત્રની નજર સામે જ દાદાને કચડી નાંખતા પંથકમાં અરેરાટી વ્યાપી ગઈ હતી.
મળતી માહિતી પ્રમાણે સોનગઢના દક્ષિણી ફળિયામાં રવિવારે સાંજે એક દુકાનમાં અનાજ-લોટ વગેરે ખાલી કરવા માટે દાહોદથી (જીજે/૧૬/એયુ/૭૫૭૬) નંબરની ટ્રક આવી હતી. રવિવારની સાંજે લગભગ ૫ વાગ્યેની આસપાસ ભરચક વિસ્તારમાં ઊભેલી આ ટ્રક અચાનક ૧૦૦થી ૧૫૦ મીટર સુધી રિવર્સ આવી ત્રણ ટુ-વ્હીલર તેમજ બે કારોને અડફેટે લઈ કચ્ચણઘાણ કાઢી રસ્તાની સાઈડે ઊભેલા વૃદ્ધ ગુલાબભાઈ ચૌધરી (રહે.ઉખલદા ગામ,તા.સોનગઢ)ને તેના પૌત્ર-પૌત્રીની નજર સામે કચડી નાંખી એક દુકાનને અડીને આ કાળમુખી ટ્રક અટકી ગઈ હતી. ટ્રકમાં ચાલક અને ક્લીનર પણ બેસેલા હતા. ચાલક ટ્રકને કાબૂમાં કરી શક્યો ન હતો. અકસ્માત થતાં જ ટ્રકનો ચાલક અને ક્લીનર સ્થળ પરથી ભાગી ગયા હતા. ઉખલદા ગમના ગુલાબભાઈ ચૌધરી તેમના પૌત્ર અને પૌત્રી સાથે પનીર લેવા માટે ડેરી પાસે ઊભા હતા. તેઓ પૌત્ર-પૌત્રીને પનીર ખરીદવા પૈસા આપી રહ્યા હતા ત્યારે કાળમુખી ટ્રકે પૌત્ર-પૌત્રીની નજર સામે તેમના દાદાને કચડી નાંખ્યા હતા. દાદાના શરીરના બે ટુકડા થઈ જતા અરેરાટી વ્યાપી ગઈ હતી. બનાવને લઇ ઘટના સ્થળે નગરજનો મોટી સંખ્યામાં ધસી આવ્યા હતા.
