ગુજરાતમાં ગુનેગારોને જેલ ભેગા કરવા માટે પોલીસ એક્શનમાં છે. આ દરમિયાન પાસા હેઠળ જેલમાં રહેતા આરોપીએ બહાર આવીને ફરીથી હત્યાને અંજામ આપતા ચકચાર મચી જવા પામી છે. શહેરના પાંડેસરાના વડોદ ગામના યુવકની આરોપીએ હત્યા કરતા પોલીસ દોડતી થઈ ગઈ હતી. આરોપી સામે ગેંગવોરમાં પાસા હેઠળ કાર્યવાહી થઈ હતી. જેણે બહાર આવીને ફરીથી હત્યાને અંજામ આપ્યો હતો.
મળતી વિગતો પ્રમાણે સુરતના પાંડેસરામાં ગેંગવોરમાં એક આરોપીને પાસા હેઠળ જેલમાં ધેકલાવામાં આવ્યો હતો. આ આરોપીએ બહાર આવીને પાંડેસરાના વડોદ ગામના સંદીપસિંગ નામના યુવકની હત્યા કરી નાંખી હતી. એક દિવસ પહેલા જ પાસામાંથી છૂટીને બહાર આવેલા અવધેશ કહાનીએ સાગરીતો સાથે મળીને વડોદ ગામના યુવકની હત્યા કરી નાંખી હતી. આવા ગુનેગારોને કારણે લોકોમાં ભયનો માહોલ ફેલાયો છે. ગાંજાના કારોબારમાં બે ગેંગ વચ્ચે થયેલી દુશ્મનાવટ આ હત્યાનું કારણ બની છે. મૃતક સંદિપસિંગ પુણેમાં સિક્યુરિટી તરીકે કામ કરતો હતો. તે મહારાષ્ટ્રથી સુરત આવ્યો હતો. જ્યારે એક દિવસ પહેલા જ પાસામાંથી છૂટેલા અવધેશ કહાનીએ તેના સાગરિતો સાથે મળીને સંદિપસિંઘની હત્યા કરી નાંખી હતી. આ હત્યાની ઘટના બનતા પોલીસ દોડતી થઈ ગઈ હતી. પાંડેસરા પોલીસે ગુનો નોંધીને વધુ તપાસ હાથ ધરી છે.
