મહેસાણા લાંચ રૂશ્વત બ્યુરોએ માર્ગ અને મકાન વિભાગના નાયબ કાર્યપાલક ડી.આર. પટેલ સામે અપ્રમાણસર મિલકતના મામલે ગુનો નોંધીને કાયદેસરની કાર્યવાહી શરૂ કરી છે. લાંબા સમયથી ચાલતી તપાસના અંતે આ કાર્યવાહી કરવામાં આવી છે. જે ભ્રષ્ટાચાર વિરુદ્ધના તંત્રના પ્રયાસોને દર્શાવે છે. આ ગુનો નોંધાવતા પહેલા ACB દ્વારા ડી.આર. પટેલની આવક અને મિલકત અંગેની સઘન તપાસ હાથ ધરવામાં આવી હતી.
આ તપાસ ખાસ કરીને 31/12/2022 સુધીના સમયગાળાની અરજીના સંદર્ભમાં કરવામાં આવી હતી.તપાસના અંતે ACB ને જાણવા મળ્યું કે નાયબ કાર્યપાલક ડી.આર. પટેલ પાસે તેમની કાયદેસરની આવકના સ્રોતોની સરખામણીએ અપ્રમાણસર મિલકત છે. આ અપ્રમાણસર મિલકતની કુલ રકમ રૂ.37,05,517 જેટલી મળી આવી છે. અપ્રમાણસર મિલકતના પુરાવાઓ મળ્યા બાદ મહેસાણા ACB પોલીસ ઇન્સ્પેક્ટર એસ.ડી. ચાવડાએ નાયબ કાર્યપાલક ડી.આર. પટેલ સામે સત્તાવાર રીતે ફરિયાદ નોંધાવી છે.ACB દ્વારા હવે આ કેસમાં વધુ ઊંડાણપૂર્વક તપાસ હાથ ધરવામાં આવશે. જેથી તેમની સંપત્તિના અન્ય સ્રોતો અને અન્ય કોઈની સંડોવણી હોય તો તે પણ બહાર લાવી શકાય. માર્ગ અને મકાન વિભાગના એક ઉચ્ચ અધિકારી સામે ભ્રષ્ટાચારનો આ ગંભીર ગુનો નોંધાતા સરકારી બાબુઓમાં ફફડાટ વ્યાપી ગયો છે.
