પોરબંદરની ફિશરીઝ કચેરી ફરી એકવાર ભ્રષ્ટાચારના મુદ્દે ચર્ચામાં આવી છે. એન્ટી કરપ્શન બ્યુરો (ACB)ની ટીમે અહીં સફળ ટ્રેપ ગોઠવીને લાંચ લેતા એક શખ્સને રંગે હાથ ઝડપી પાડ્યો છે, જેના કારણે સરકારી બાબુઓમાં ફફડાટ વ્યાપી ગયો છે.
મળતી માહિતી મુજબ, માછીમાર દ્વારા પોતાની બોટનું રજિસ્ટ્રેશન કરાવવા માટે અરજી કરવામાં આવી હતી. આ કામ ઝડપથી કરાવી આપવાના બદલામાં લાંચની માંગણી કરવામાં આવી હતી. લાંચ માંગનાર શખ્સે ફરિયાદીને જણાવ્યું હતું કે, ‘ઉચ્ચ અધિકારીઓને રૂપિયા આપવા પડશે’, તેમ કહીને રૂપિયા 10,000ની લાંચ માંગી હતી. જોકે, આ બાબતે ફરિયાદીએ સીધો ACBનો સંપર્ક કર્યો હતો. ACBની ટીમે વ્યૂહાત્મક રીતે ગોઠવેલી ટ્રેપમાં, દિનેશ પ્રેમજી સલેટ નામનો આ શખ્સ રૂપિયા 10,000 ની લાંચ સ્વીકારતા જ ઝડપાઈ ગયો હતો. ACBએ લાંચ લેનાર શખ્સ વિરુદ્ધ ગુનો નોંધી કાયદેસરની કાર્યવાહી હાથ ધરી છે અને હવે આ લાંચના તાર કચેરીના અન્ય અધિકારીઓ સુધી જોડાયેલા છે કે કેમ, તે દિશામાં વધુ તપાસ શરૂ કરી છે. આ સફળ ટ્રેપથી સ્પષ્ટ થાય છે કે ભ્રષ્ટાચાર કરનારાઓ સામે ACB સખત કાર્યવાહી કરવા કટિબદ્ધ છે.
