વડોદરા શહેરમાં પ્રવાસ પેકેજના બહાને છેતરપિંડીનો ચોંકાવનારો કેસ સામે આવ્યો છે.હરણી વિસ્તારમાં રહેતા બિલ્ડિંગ કન્સ્ટ્રક્શનના વ્યવસાયી સાથે દુબઈ ટૂર પેકેજની આડમાં 6.24 લાખ રૂપિયા પડાવી લીધા હોવાનું બહાર આવતા વારસિયા પોલીસે બે આરોપીઓ સામે ગુનો દાખલ કરી તપાસ શરૂ કરી છે.
ફરિયાદી મહેશકુમાર બળવંતસિંહ ગઢવીએ જણાવ્યા મુજબ આરોપી રાજીવ પારેખ અને તેનો પુત્ર આર્યન પારેખે તેમના સમગ્ર પરિવારને દુબઈ ટૂર પર લઈ જવા માટે 8.85 લાખ રૂપિયાનું પેકેજ ઓફર કર્યું હતું. પેકેજમાં ફ્લાઇટ ટિકિટ, હોટલ સ્ટે, લોકલ ટ્રાન્સફર અને સાઇટસીંગનો સમાવેશ થતો હતો. વિશ્વાસ રાખીને ફરિયાદીએ આરોપીઓને 8.69 લાખ રૂપિયા એડવાન્સ રૂપે આપી દીધા હતા.
આરોપીઓ પરિવારને અમદાવાદથી અબુધાબી થકી દુબઈ લઈ ગયા અને હયાત હોટેલમાં રોકાણ કરાવ્યું હતું. દેખીતી રીતે બધું સામાન્ય લાગતું હતું, પરંતુ ત્યારબાદ છેતરપિંડીનો ખેલ શરૂ થયો.
દુબઈમાં રોકાણ દરમિયાન આરોપીઓએ પેકેજમાં ન આવતા ખર્ચાના બહાને ફરિયાદી પાસેથી વધારામાં 6,24,190 રૂપિયા વસૂલ્યા જેમાં 2,26,000 રૂપિયા “ઉધાર” તરીકે, 3,98,190 રૂપિયા હોટલ અને સાઇટસીંગ ટિકિટનાં નામે ઉઘરાવ્યા હતા. ફરિયાદી અનુસાર આ તમામ વસૂલાત દબાણ અને ગેરમાર્ગે દોરણાથી કરવામાં આવી હતી.
ભારત પરત આવ્યા બાદ ગઢવીએ વધારામાં વસૂલ કરાયેલા રૂપિયા પરત માંગ્યા ત્યારે આરોપીઓએ પૈસા આપવાનો સ્પષ્ટ ઈનકાર કરી દીધો. ફરિયાદીનો નાના ભાઈ મિહિરકુમાર ગઢવીએ રાજીવ પારેખને ફોન પર નાણાં પરત આપવા કહ્યું ત્યારે રાજીવ પારેખ ગુસ્સે ભરાઈ ગયો અને ગંભીર ધમકીઓ ઉચ્ચારી દીધી. ફોન પર રાજીવ પારેખે કહ્યું કે તમને કોઈ પૈસા મળવાના નથી. મારું નેટવર્ક મોટું છે, વડોદરામાં રહેતા હો તો મારી સામે ન આવશો. તમારા હાથ-પગ તોડાવી નાખીશ. તમારો કન્સ્ટ્રક્શનનો ધંધો બંધ કરાવી દઈશ. આ ધમકીના કારણે પરિવાર ભયભીત બન્યો હતો.
આ સમગ્ર બનાવ અંગે ફરિયાદી દ્વારા વારસિયા પોલીસ સ્ટેશનમાં ફરિયાદ કરવામાં આવી છે. પોલીસે આરોપી રાજીવ પારેખ અને તેના પુત્ર આર્યન પારેખ વિરુદ્ધ છેતરપિંડી, વધારાની વસૂલાત અને જીવલેણ ધમકીઓ આપવા જેવી ગંભીર કલમો હેઠળ ગુનો નોંધીને તપાસ શરૂ કરી છે. પોલીસ આરોપીઓની પૃષ્ઠભૂમિ, અન્ય કોઈને આ પ્રકારની છેતરપિંડી કરી છે કે નહીં અને વસૂલ કરાયેલ નાણાં ક્યાં વપરાયા તેની પણ તપાસ કરી રહી છે.
