દાહોદમાં આમ આદમી પાર્ટીના નેતા દેવેન્દ્ર મેડા વિરુદ્ધ અપહરણ અને શારીરિક અડપલાંની ગંભીર ફરિયાદ નોંધાતા રાજકારણ ગરમાયું છે. દાહોદ બી ડિવિઝન પોલીસે ફરિયાદના આધારે દેવેન્દ્ર મેડાની તાત્કાલિક અટકાયત કરી કાયદેસરની કાર્યવાહી હાથ ધરી છે.
પ્રાપ્ત માહિતી મુજબ, આમ આદમી પાર્ટીના નેતા દેવેન્દ્ર મેડાએ એક મહિલાને નોકરી આપવાની લાલચ આપી હતી. આ લાલચ આપીને તેમણે મહિલાનું અપહરણ કર્યું હોવાનો ફરિયાદમાં ઉલ્લેખ કરવામાં આવ્યો છે. આ ઉપરાંત, કારની અંદર મહિલા સાથે શારીરિક અડપલાં પણ કર્યા હોવાનો ગંભીર આક્ષેપ ફરિયાદમાં છે.દેવેન્દ્ર મેડા થોડા દિવસો અગાઉ જ પૂર્વ BTP ગુજરાત પ્રદેશ પ્રમુખ તરીકેની જવાબદારીમાંથી મુક્ત થઈને અરવિંદ કેજરીવાલના હસ્તે આમ આદમી પાર્ટીમાં જોડાયા હતા.પોલીસ સૂત્રોના જણાવ્યા અનુસાર, આરોપી દેવેન્દ્ર મેડા વિરુદ્ધ અગાઉ પણ ગંભીર પ્રકારના ગુનાઓ નોંધાયેલા છે. તેમાં ખંડણી ઉઘરાવવી અને ગેરકાયદેસર હથિયાર રાખવા સહિત વિવિધ પ્રકારના ગુન્હાનો સમાવેશ થાય છે. દાહોદ બી ડિવિઝન પોલીસે દેવેન્દ્ર મેડાની અટકાયત કરીને સમગ્ર મામલે વધુ તપાસ શરૂ કરી છે.
