ગુજરાતમાં ACB દ્વારા ભ્રષ્ટાચાર સામેની ઝુંબેશ વધુ તેજ બનાવવામાં આવી છે. તાજેતરમાં, વ્યારાના નિવૃત્ત મદદનીશ નિયામક સંતોષ પરુલકર સામે અપ્રમાણસર મિલકતનો ગુનો દાખલ કરીને તેમની ધરપકડ કરવામાં આવી છે.
આ કેસમાં તેમના પગાર અને અન્ય કાયદેસર આવકના સ્ત્રોતની સરખામણીમાં તેમની મિલકતમાં 112.20% નો વધારો જોવા મળ્યો છે. ACBની તપાસમાં સંતોષ પરુલકર પાસેથી 2.35 કરોડ રૂપિયાની અપ્રમાણસર મિલકત મળી આવી હતી. આ ઘટનાએ ફરી એકવાર સરકારી વિભાગોમાં ચાલતા ભ્રષ્ટાચારની પોલ ખોલી છે.
ACB ને સંતોષ પરુલકરની ગેરકાયદેસર કમાણી વિશે ગુપ્ત માહિતી મળી હતી, જેના આધારે એક વિસ્તૃત તપાસ હાથ ધરવામાં આવી હતી. આ તપાસમાં તેમના નામે અને બેનામી મિલકતોની વિગતો બહાર આવી હતી, જે તેમની કાયદેસરની આવક કરતાં અનેક ગણી વધારે હતી. પુરાવાઓ એકત્રિત કર્યા બાદ ACBએ સંતોષ પરુલકર સામે ગુનો દાખલ કરીને તેમની તાત્કાલિક ધરપકડ કરી હતી.
