ભાવનગરના મહુવા તાલુકામાં આવેલા ઊંચા કોટડા ગામે એક અત્યંત દુઃખદ ઘટના બની છે. ગણેશ વિસર્જન દરમિયાન દરિયામાં નહાવા ગયેલા એક 17 વર્ષીય કિશોરનું ડૂબી જવાથી કરુણ મોત થયું છે. આ ઘટનાને પગલે સમગ્ર વિસ્તારમાં શોકની લાગણી છવાઈ ગઈ છે અને લોકોના મોટા ટોળા ઘટનાસ્થળે એકઠા થયા હતા. આ મૃતક કિશોરની ઓળખ બેલમપર ગામના 17 વર્ષીય યુવાન તરીકે થઈ છે. તે ઊંચા કોટડા ખાતે ગણેશજીની પ્રતિમાનું વિસર્જન કરવા માટે અન્ય લોકો સાથે દરિયા કિનારે આવ્યો હતો.
વિસર્જન બાદ તે દરિયામાં નહાવા પડ્યો હતો. પરંતુ પાણીના ઊંડાણમાં અચાનક તે ગરક થઈ ગયો. કિશોર ડૂબી રહ્યો હોવાની જાણ થતાં જ આસપાસના લોકોએ તેને બચાવવા માટે પ્રયાસો કર્યા હતા પરંતુ તે સફળ રહ્યા નહીં. તાત્કાલિક આ ઘટનાની જાણ મહુવા નગરપાલિકાની ફાયર બ્રિગેડ ટીમને કરવામાં આવી. ફાયર ટીમે તાત્કાલિક ઘટનાસ્થળે પહોંચીને શોધખોળની કામગીરી હાથ ધરી હતી. ભારે જહેમત અને લાંબી શોધખોળ બાદ કિશોરનો મૃતદેહ મળી આવ્યો હતો.આ કરુણ ઘટનાથી સમગ્ર વિસ્તારમાં શોકનું મોજું ફરી વળ્યું છે. કિશોરના પરિવાર પર આભ તૂટી પડ્યો હોય તેવી સ્થિતિ સર્જાઈ છે. મૃતદેહને તાત્કાલિક પોસ્ટમોર્ટમ માટે હોસ્પિટલ ખસેડવામાં આવ્યો છે. ગણેશ ઉત્સવના પાવન પર્વ પર બનેલી આ દુર્ઘટનાએ લોકોને ગમગીન કરી દીધા છે. આ ઘટના એ પણ દર્શાવે છે કે વિસર્જન દરમિયાન સાવચેતી રાખવી અને ઊંડા પાણીમાં ન જવું કેટલું જરૂરી છે.
