સુરત શહેરના અમરોલી વિસ્તારમાં ગણેશ વિસર્જન પૂર્વે ડીજેના તાલે ગરબા રમતી વખતે 41 વર્ષની મહિલાનું બેભાન થયા બાદ મોત થયું હતું. આ મહિલાનું હાર્ટએટેકથી મોત થયું હોવાની શક્યતા છે.
પ્રાપ્ત માહિતી અનુસાર મૂળ ભાવનગર જિલ્લાના વલ્લભીપુર તાલુકામાં આવેલા કલ્યાણપુરના વતની હરેશભાઈ લકુમ હાલમાં અમરોલી ખાતે મધુવન સોસાયટીના હેત્વી એપાર્ટમેન્ટમાં પરિવાર સાથે રહે છે. તેમને સંતાનમાં એક દીકરી છે, અને તેઓ પોતે રત્નકલાકાર તરીકે હીરાના કારખાનામાં કામ કરી પરિવારનું ગુજરાન ચલાવે છે. હેત્વી એપાર્ટમેન્ટમાં ગણપતિ બાપાનું સ્થાપન કરવામાં આવ્યું હતું. આજે વિસર્જનના દિવસે બપોરના સમયે એપાર્ટમેન્ટની અગાસી પર વિસર્જનની તૈયારીઓ કરાઈ હતી. વિસર્જન પૂર્વે ગરબાનું આયોજન કરાયું હતું. જેમાં રત્નકલાકારના પત્ની 41 વર્ષીય રૂપાબેન ગરબા રમતા રમતા બેભાન થઈ ગયા હતા. જેથી તેણીને પ્રથમ ખાનગી અને બાદમાં સિવિલ હોસ્પિટલમાં સારવાર માટે લઈ જવાયા હતા. જ્યાં તેણીનું મોત થયું હતું.આ બનાવ અંગે પોલીસને જાણ કરતાં પોલીસે આગળની કાર્યવાહી સાથે વધુ તપાસ હાથ ધરી હતી.
