સુરતમાં રેસ્ટોરન્ટના વોશરૂમનો ઉપયોગ મહિલાઓ માટે ખતરો બન્યો. શહેરમાં પીપલોદની એક રેસ્ટોરન્ટમાં મહિલાનો વીડિયો ઉતારનાર શખ્સ આખરે ઝડપાયો છે. પોલીસે આ શખ્સની તપાસ કરતાં અન્ય ચોંકાવનારી માહિતી સામે આવી. આ શખ્સના ફોનમાંથી અન્ય મહિલાઓના પણ વીડિયો મળી આવ્યા. પોલીસે આ શખ્સની અટકાયત કરી તેનો ફોન કબજે કરી FSLમાં મોકલી આપ્યો.
ઘટનાની પ્રાપ્ત વિગત મુજબ ગત રવિવારના રોજ સુરતના પીપલોદની કે.ચારકોલ રેસ્ટોરન્ટમાં એક મહિલા વોશરૂમમાં ગઈ હતી. જ્યાં મહિલાની નજર વોશરૂમમાં ગ્રીલ પાછળ મુકાયેલ એક ફોન પર ગઈ. મહિલાને ગ્રીલ પાછળ ફોન દેખાતા તેને શંકા ગઈ અને મોબાઇલ ચેક કર્યો. જ્યાં આ મોબાઈલ ચેક કરતાં તેમાં તેનો વીડિયો જોવા મળ્યો હતો. આ જોઈ મહિલાને વધુ આઘાત લાગ્યો અને તેની સાથે આવેલા મિત્રને વાત કરી. મહિલા અને તેના મિત્રએ રેસ્ટોરન્ટના મેનેજરને લઈને સમગ્ર મામલે પૂછપરછ કરતા મામલો ગરમાયો હતો. જેના બાદ તેમણે સમગ્ર ઘટનાને લઈને પોલીસમાં ફરિયાદ કરી.પોલીસે ઘટનાની તપાસ કરતા રેસ્ટોરન્ટના વોશરૂમમાં મોબાઈલ કોણે મૂકયું હતું તે સામે આવ્યું. મહિલાઓના મોબાઈલ ઉતારનાર એક સફાઈકર્મી હોવાનું સામે આવ્યું. આ વીડિયોની વચ્ચે સુરેન્દ્રનો ચહેરો પણ કેદ થઈ ગયો હતો. પોલીસે સફાઈકર્મી સુરેન્દ્રરાણાની અટકાયત કરી. ઉમરા પોલીસે આરોપી સુરેન્દ્ર રાણા વિરુદ્ધ પાસ હેઠળ કાર્યવાહી કરી ભુજ જેલમાં મોકલી દેવાયો. આરોપીના ફોન માંથી અલગ-અલગ મહિલાઓના 5 વીડિયો મળ્યા હતા. જેના બાદ વધુ તપાસ માટે ઉમરા પોલીસે સુરેન્દ્રના બંને ફોન કબજે કરી FSLમાં મોકલી આપ્યા હતા.
