નવી દિલ્હી/લખનઉ: ભારતના સંરક્ષણ અને એરોસ્પેસ ક્ષેત્રમાં આત્મનિર્ભરતા તરફ વધુ એક મહત્વપૂર્ણ પગલું ભરાયું છે. ઉત્તર પ્રદેશ ડિફેન્સ ઇન્ડસ્ટ્રીયલ કોરિડોરમાં કાર્યરત કાવા યુએવી પ્રાઇવેટ લિમિટેડ (HoverIt) દ્વારા વિકસાવવામાં આવેલા નેક્સ્ટ જનરેશન જેટ સંચાલિત લોઇટિંગ મ્યુનિશન ‘દિવ્યાસ્ત્ર એમકે-3’નું 11 ઓગસ્ટ, 2026ના રોજ ઉત્તર પ્રદેશની નિર્ધારિત એરસ્ટ્રિપ પરથી સફળ પરીક્ષણ કરવામાં આવ્યું હતું.
કંપનીના જણાવ્યા અનુસાર, આ સિસ્ટમ સંપૂર્ણપણે સ્વદેશી ડિઝાઇન, વિકાસ અને નિર્માણ પર આધારિત છે અને તેમાં ભારતીય બનાવટનું જેટ એન્જિન ઉપયોગમાં લેવામાં આવ્યું છે. લોઇટિંગ મ્યુનિશન એવી માનવરહિત હવાઈ સિસ્ટમ છે, જે નિર્ધારિત વિસ્તારમાં લાંબા સમય સુધી ઉડાન ભરીને લક્ષ્યની ઓળખ અને પસંદગી માટે તૈનાત રહી શકે છે તથા યોગ્ય સમયે ચોક્કસ પ્રહાર કરવાની ક્ષમતા ધરાવે છે.
‘દિવ્યાસ્ત્ર એમકે-3’ને ડીજી પ્રોપલ્શન દ્વારા વિકસાવવામાં આવેલા જેટ એન્જિનથી શક્તિ મળે છે. પરીક્ષણ દરમિયાન એન્જિનનું પ્રદર્શન નિર્ધારિત માપદંડો અનુસાર સફળ રહ્યું હોવાનું કંપનીએ જણાવ્યું છે. કંપનીના દાવા મુજબ, આ એન્જિન હવે મિશન ઉપયોગ માટે સક્ષમ સાબિત થયું છે અને ‘દિવ્યાસ્ત્ર એમકે-3’ માટે યોગ્ય છે.અત્યાર સુધી ભારતમાં આ પ્રકારની સિસ્ટમોમાં વિદેશી ટેકનોલોજી પર નિર્ભરતા અથવા પરંપરાગત પ્રોપેલર એન્જિન આધારિત પ્લેટફોર્મનો વધુ ઉપયોગ થતો હતો. જેટ એન્જિનના સ્વદેશી ઉપયોગથી આ સિસ્ટમની ઝડપ, કાર્યક્ષમતા અને કામગીરીની ક્ષમતામાં નોંધપાત્ર સુધારો થવાની અપેક્ષા છે.
આ પરીક્ષણને માત્ર એક ડ્રોનની સફળ ઉડાન તરીકે નહીં, પરંતુ ભારતના સ્વદેશી એરોસ્પેસ અને ડિફેન્સ મેન્યુફેક્ચરિંગ ક્ષેત્ર માટે મહત્વપૂર્ણ સિદ્ધિ તરીકે જોવામાં આવી રહ્યું છે. જેટ એન્જિન જેવી જટિલ ટેકનોલોજીના સ્વદેશી વિકાસ અને તેના માનવરહિત હવાઈ પ્લેટફોર્મમાં સફળ સંકલનથી ભારતની સ્થાનિક સંરક્ષણ ઉત્પાદન ક્ષમતાને વધુ મજબૂતી મળવાની શક્યતા છે.કાવા યુએવી અને ડીજી પ્રોપલ્શનની આ કામગીરી ભારતના ‘આત્મનિર્ભર ભારત’ અને સ્વદેશી સંરક્ષણ ઉત્પાદનના પ્રયાસોને વધુ વેગ આપતી મહત્વપૂર્ણ ઉપલબ્ધિ તરીકે સામે આવી છે.
