ઉત્તરાખંડના ગઢવાલ ક્ષેત્રમાં સ્થિત બદ્રીનાથ ધામના દરવાજા શિયાળા માટે બંધ થતાં મંગળવારે ચારધામ યાત્રાનું સમાપન થયું હતું. ભગવાન બદ્રી વિશાળના કપાટ બંધ થવાની સાથે આ વર્ષે 16.60 લાખથી વધુ શ્રદ્ધાળુએ ભગવાનના દર્શન કર્યા હોવાનું જણાવ્યું હતું.
શ્રી બદ્રીનાથ કેદારનાથ મંદિર સમિતિના અધિકારીઓએ જણાવ્યું હતું કે ખાસ પૂજા પછી આજે બપોરે ૨.૫૬ વાગ્યે બદ્રીનાથ ધામના દરવાજા ભક્તો માટે બંધ કરવામાં આવ્યા હતા. ઠંડી હોવા છતાં, ભારત અને વિદેશથી મોટી સંખ્યામાં ભક્તો બદ્રી વિશાલના દર્શન માટે હાજર રહ્યા હતા. તેમણે જણાવ્યું હતું કે દરવાજા બંધ કરવાની પ્રક્રિયા સવારે શરૂ થઈ હતી. બંધ પહેલાંની છેલ્લી પૂજા બદ્રીનાથ મંદિરના મુખ્ય પૂજારી રાવલ અમરનાથ નંબુદ્રીએ કરી હતી. આ પ્રસંગે મંદિર સંકુલને અનેક ક્વિન્ટલ ફૂલોથી શણગારવામાં આવ્યું હતું, જેમાં મુખ્યત્વે પીળા અને નારંગી રંગના ગલગોટાના ફૂલોનો સમાવેશ થાય છે.બદ્રીનાથ ધામનું વાતાવરણ સવારથી જ પરંપરાગત લોકનૃત્યો અને ભજન કીર્તનોથી ભક્તિથી ભરેલું હતું, જેમાં સેનાના ગઢવાલ સ્કાઉટ બેન્ડની મધુર ધૂન પણ સંભળાઈ હતી. ભગવાન બદ્રીનાથની ‘ઉત્સવ ડોલી’ આવતીકાલે તેમના શિયાળુ નિવાસસ્થાન જ્યોતિર્મઠ સ્થિત નરસિંહ મંદિર માટે રવાના થશે, જ્યાં શિયાળા દરમિયાન ભક્તો એમના દર્શન કરી શકશે.
