અમદાવાદમાં દિલ્હી ક્રાઈમ બ્રાંચનો ASI લાંચ લેતા ઝડપાઈ ગયો છે. દિલ્હી ક્રાઈમ બ્રાંચના અધિકારી શિવકુમારે એક કરોડની લાંચ માંગી હતી. વિઝા કન્સલ્ટન્ટના ત્યાં દરોડા પાડ્યા બાદ એક કરોડ રૂપિયાની લાંચ માગી હતી. ACBએ આરોપીને લાંચ લેતા રંગેહાથે ઝડપી પાડ્યો હતો.
ફરીયાદી વીઝા કન્સલ્ટન્ટ નું કામ કરે છે.ગઇ તા.૨૯/૦૭/૨૫ નાં રોજ તેઓ સી.જી.રોડ ખાતે આવેલ ઓમ ગ્લોબલ ટુર્સ એન્ડ વીઝા કન્સલટન્ટ ની ઓફીસે હાજર હતા તે દરમ્યાન આ ઓફીસમાં દીલ્હી ક્રાઇમ બ્રાન્ચની રેડ પડી હતી. તેમા ઓફીસ અને ફરીયાદીની ગાડીની ઝડતી કરવામાં આવી હતી અને ઓફીસમાંથી બે લેપટોપ તથા બે પ્રીન્ટર અને ફરીયાદીનાં કુલ-૧૭ પાસપોર્ટ વોલેટ,આધારકાર્ડ,એ.ટી.એમ કાર્ડ,અસલ ડ્રાઇવીંગ લાયસન્સ,અસલચુંટણી કાર્ડ,અસલ પાનકાર્ડ, બે ચેકબુક અને રૂ. 20 હજાર રોકડા લઇ લીધા હતા.
દીલ્લીના એક સહઆરોપી તરીકે ફરીયાદીનું નામ ખુલતુ હોવાનો આરોપ મુકી ફરીયાદી તથા ઓમ ગ્લોબલ ટુર્સનાં માલીકને નવરંગપુરા પોલીસ સ્ટેશન લઇ ગયા હતા. ત્યાં લઇ જઇ બન્નેને પોલીસ સ્ટેશનની બહાર બેસાડી રાખ્યા હતા.તે દરમ્યાન આરોપીએ તેમના મીત્ર સંજય પટેલને બોલાવીને ઓમ ગ્લોબલ ટુર્સનાં માલીકે તેમના મીત્ર ચીત્રેશ સુતરીયાને બોલાવ્યા હતા. આ ચીત્રેશ સુતરીયા અને સંજયપટેલ બન્ને એકબીજાને પહેલાથી ઓળખતા જ હતા. ત્યાર બાદ આ બન્ને એ મધ્યસ્થી કરીને ફરીયાદી અને ઓમ ગ્લોબલ ટુર્સનાં માલીકને તાત્કાલીક છોડાવ્યા હતાં.
આરોપીએ ફરીયાદી અને ઓમ ગ્લોબલ ટુર્સનાં માલીકને નિવેદન લખાવવા દીલ્લી મુકામે હાજર રહેવા માટે નોટીસ આપી હતી. ઓફીસમાંથી અને ફરીયાદીની ગાડીમાંથી કબ્જે લીધેલા દસ્તાવેજો તેમની સાથે લઇ ગયા હતા.ત્યાર બાદ ફરીયાદી દીલ્હી મુકામે જઇ આરોપીને મળતાં આરોપીએ ઉપરોક્ત ગુનામાં આરોપી તરીકે ફરીયાદીનું નામ નહી ખોલવા અને કબજે લીધેલ અસલ દસ્તાવેજો પરત આપવાના બદલામાં ફરીયાદી પાસે રૂપીયા એક કરોડની લાંચની માંગણી કરી હતી. ત્યાર બાદ આરોપી નં.૨ અને ૩ દ્વારા સતત નાણાંની માંગણી ચાલુ રહેલ હતી. પરંતુ ફરીયાદી પાસે આટલી મોટી રકમની વ્યવ્સ્થા થઈ નહોતી.જેથી તેઓએ આરોપીઓને નાણાં આપ્યા નહોતા.જેથી આરોપી નં-૧ એ દીલ્હી ક્રાઇમ બ્રાન્ચના ગુનામાં આરોપીનું નામ સહઆરોપી તરીકે ખોલી નાંખ્યું હતું અને ફરીયાદીને ભાગેડું જાહેર કરી ચાર્જશીટ દાખલ કરી હતી પરંતુ ચાર્જશીટમાં ફરીયાદીના કબજે લીધેલા દસ્તાવેજોનો ઉલ્લેખ કર્યો નહોતો. ત્યાર બાદ ત્રણેય આરોપીઓએ એકબીજાના મેળાપીપણાથી ગુનાની ચાર્જ્શીટમાંથી ભાગેડું આરોપી તરીકે ફરીયાદીનું નામ કઢાવી આપવા અને ફરીયાદીનાં અસલ દસ્તાવેજો પરત અપવાના બદલામાં ફરીયાદી પાસે 80 લાખ રૂપિયાની માંગણી કરી હતી તે પૈકી રૂ 10 લાખ એડવાન્સમાં અને બાકીનાં અસલ દસ્તાવેજો પાછા મળી જાય અને ચાર્જશીટમાંથી ભાગેડુ આરોપી તરીકે નામ નીકળી જાય ત્યાર બાદ આપવાનું નક્કી કરેલ હતું.ફરીયાદી આ લાંચના નાણાં આપવા ઇચ્છતા ન હોઇ એ.સી.બીનો સંપર્ક કર્યો હતો. ત્યાર બાદ ACBએ છટકું ગોઠવીને આરોપીને લાંચ લેતા રંગે હાથે ઝડપી પાડ્યો હતો.
