ઉત્તર પ્રદેશની યોગી સરકારે રાજ્યની સુરક્ષા વ્યવસ્થાને વધુ સજ્જ અને ચુસ્ત બનાવવા માટે મદરેસાઓને લઈને એક મહત્વપૂર્ણ નિર્ણય લીધો છે. સુરક્ષા એજન્સીઓને સંપૂર્ણ રીતે ચોક્કસ અને સક્રિય રાખવાના ઉદ્દેશથી સરકારે હવે એક નવો પ્રોટોકોલ લાગુ કર્યો છે. આ નવા નિયમ હેઠળ, રાજ્યના તમામ મદરેસાઓમાં ભણાવતા મૌલાનાઓ, શિક્ષકો અને તમામ વિદ્યાર્થીઓની સંપૂર્ણ વિગતો એન્ટી ટેરરિસ્ટ સ્ક્વોડ (ATS) ને સોંપવી ફરજિયાત કરવામાં આવી છે. દેશની રાજધાની દિલ્હીમાં થયેલા તાજેતરના વિસ્ફોટ પછી ઘણા રાજ્યોની સુરક્ષા એજન્સીઓ દ્વારા તપાસનો વ્યાપ વધારવામાં આવ્યો છે, ત્યારે યુપી સરકારે આ પગલુ ભર્યું છે.
નવા આદેશ મુજબ, ઉત્તર પ્રદેશના તમામ મદરેસાઓએ પોતાના સંસ્થામાં કામ કરતા તમામ શિક્ષકો અને ધાર્મિક પ્રશિક્ષકોની વ્યક્તિગત બેગ્રાઉન્ડ, મોબાઇલ નંબર, કાયમી સરનામું, આધાર કાર્ડ અને અન્ય ઓળખ સંબંધિત કાગળિયાત ATSની ઓફિસમાં ઉપલબ્ધ કરાવવા પડશે. આ જ રીતે, મદરેસાઓમાં અભ્યાસ કરતા તમામ વિદ્યાર્થીઓની વિગતો અને મોબાઇલ નંબર પણ સૂચિબદ્ધ કરીને જમા કરાવવા અનિવાર્ય છે. સૂત્રોના જણાવ્યા અનુસાર, આ પ્રક્રિયા માત્ર ડેટા એકત્રીકરણ કે સર્વે નથી, પરંતુ એક વ્યાપક સુરક્ષા ઓડિટનો ભાગ છે, જેથી કોઈ પણ સંસ્થામાં શંકાસ્પદ તત્વોની હાજરીને સમયસર ઓળખી શકાય અને તેને રોકી શકાય.છેલ્લા કેટલાક મહિનાઓમાં કેટલીક ગુપ્તચર એજન્સીઓએ કેટલાક મદરેસાઓ અને ખાનગી ધાર્મિક સંસ્થાઓમાં અન્ય રાજ્યોના યુવાનોની વધતી અવરજવર પર ધ્યાન આપ્યું હતું. આ મામલે સાવધાની રાખવામાં આવી હતી. આ જ સંદર્ભમાં, ATS ને હવે મદરેસાઓના વ્યાપક બેકગ્રાઉન્ડ વેરિફિકેશનની જવાબદારી સોંપવામાં આવી છે.
ઉલ્લેખનીય છે કે, દિલ્હીમાં થયેલા તાજેતરના વિસ્ફોટ બાદ રાષ્ટ્રીય સુરક્ષા એજન્સીઓ વધુ સક્રિય બની ગઈ છે. કેન્દ્રીય એજન્સીઓની સાથે રાજ્ય સ્તરીય ટીમોને પણ ધાર્મિક અને શૈક્ષણિક સંસ્થાઓમાં આવતા-જતા લોકોની ઓળખની ક્રોસ-ચેકિંગ કરવાના નિર્દેશો મળ્યા છે. એજન્સીઓ સ્પષ્ટતા કરે છે કે આ પગલુ કોઈ સંસ્થાની વિરુદ્ધ નથી, પરંતુ સુરક્ષાને પ્રાથમિકતા આપવાની નીતિનો ભાગ છે, જેથી કોઈ પણ સંભવિત જોખમને શરૂઆતથી જ અટકાવી શકાય.માત્ર મદરેસાઓ જ નહીં, પરંતુ કેટલીક ખાનગી યુનિવર્સિટીઓ પણ સુરક્ષા એજન્સીઓની તપાસના દાયરામાં આવી ગઈ છે. જેમાં લખનઉ સ્થિત ઇન્ટિગ્રલ યુનિવર્સિટીનું નામ સામેલ છે. આ યુનિવર્સિટી ત્યારે ચર્ચામાં આવી જ્યારે દિલ્હી બ્લાસ્ટની તપાસ દરમિયાન ત્યાં ભણાવતા એક શિક્ષક પરવેઝ અંસારીનું નામ સામે આવ્યું. જોકે ગુપ્તચર એજન્સીઓએ યુનિવર્સિટી પ્રશાસનને જમ્મુ-કાશ્મીરથી આવતા તમામ પ્રોફેસરોની ઓળખ અને દસ્તાવેજો તેમજ ત્યાં અભ્યાસ કરતા જમ્મુ-કાશ્મીરના વિદ્યાર્થીઓનો રેકોર્ડ જમા કરાવવાનો નિર્દેશ આપ્યો છે. આ ઉપરાંત, યુનિવર્સિટીમાં અભ્યાસ કરતા વિદેશી વિદ્યાર્થીઓની સંખ્યા, તેનો અભ્યાસક્રમ અને તેની ભૂમિકાઓની વિગતો પણ ઇન્ટેલિજન્સ વિભાગને સોંપવાનું ફરજિયાત કરાયું છે.
